शेर्पा जातिको परिचय

 

शेर्पा जातिको परिचय ।

शेर्पा नेपालका एक प्राचीन र प्रसिद्ध पहाडी जाति हुन्। उनीहरूको मूल वासस्थान सोलुखुम्बु जिल्ला (खासगरी सगरमाथा क्षेत्र) हो। ‘शेर्पा’ शब्दको अर्थ शेर्पा भाषामा “पूर्वतर्फको मालिक” भन्ने हुन्छ, किनकि उनीहरु काठमाडौंको पूर्वतिर बसोबास गर्छन् ।

शेर्पा जाति हिमाली भेगका जीवनशैली, धार्मिक आस्था, साहस र पहाडसँगको सम्बन्धका कारण विश्वभर परिचित छन्। उनीहरू विशेषगरी पर्वतारोहण, पर्यटन, चौरी गाई, याक पालन, आलु खेती, वा खेती आदि कार्यमा संलग्न छन्।

भाषा र धर्म

शेर्पाहरूले शेर्पा भाषा बोल्छन्। धर्मतर्फ, शेर्पाहरू महायान बौद्ध धर्मको ङिङमा सम्प्रदायका अनुयायी हुन्। लामा, रिन्पोछे र गुम्बाहरू उनीहरूको सामाजिक र धार्मिक जीवनको केन्द्र हुन्।

संस्कार र संस्कृति

शेर्पाहरूको जीवनमा संस्कृति, परम्परा, चाडपर्व र नाचगानको ठूलो महत्व छ। शेर्पाहरूले विशेषगरी लोसार, डुम्जी, मानी रिम्डु, जस्ता चाडहरू धूमधामले मनाउँछन्। शेर्पा समुदायमा पाहुनालाई सम्मान दिने, सहकार्य गर्ने, सहयोगी भावना राख्ने संस्कारले शेर्पाहरूलाई अझै विशिष्ट बनाएको छ।

जीवनयापन र विशेषता

शेर्पाहरू बलिया, सहनशील र हिमाली मौसमअनुकूल अनुकूलित भएका कारण उत्कृष्ट पर्वतारोहण सहयोगी का रूपमा प्रसिद्ध छन्। संसारकै अग्लो शिखर सगरमाथा (एभरेस्ट) मा सफल आरोहण गराउन शेर्पाहरूको योगदान अत्यन्त महत्वपूर्ण छ।

शेर्पा जातिको योगदान

शेर्पा जातिले नेपाललाई अन्तर्राष्ट्रिय पर्यटन क्षेत्रमा परिचित गराउन ठूलो भूमिका खेलेका छन्। उनीहरूको साहस, ईमानदारी, मेहनत, र पहाडी जीवनशैलीको कारण नेपालका हिमालहरू विश्वभर झनै लोकप्रिय बनेका छन्।

निष्कर्षमा, शेर्पा जाति केवल पर्वतारोहणमा मात्र होइन, धार्मिक, सांस्कृतिक र सामाजिक राजनितीक, ब्यबसाय, कलाकार, पत्रकारिता दृष्टिले पनि नेपालमा विशेष स्थान ओगटेका छन्। उनीहरूको जीवनशैली र दर्शनबाट सहिष्णुता, सरलता र प्रकृतिप्रति सम्मान गर्ने भावना सिक्न सकिन्छ।